India ramah Covid-19 kai nuai 13.8 chuang tawh

Covid-19 hripui lengin zual lam a pan zel a, nimina Ministry of Health and Family Welfare report tihchhuahah chuan hri kai hmuh chhuah thar 48,661 lai awm lehin ram pumah hri kai mi 13,85,522 an awm tawh a ni.

Nimina report an tihchhuah thleng hian enkawl dam 8,85,577 awm tawhin darkar 24 chhungin dama puan mi 36,145 an awm a, hri kai mek 4,67,882 an la awm. Enkawl dam tawh rate hi 63.91% a ni tawh a, thihpui 705 lai an awm leh avangin hripui vanga thi mi 32,063 an awm tawh. Thihpui tawh rate hi 2.31% a ni bawk.

Indian Council of Medical Research (ICMR) chuan darkar 24 chhungin sample 4,42,263 an test tih tarlangin hei hi ni khata sample an test tam ber a ni a, nimina report an tihchhuah thleng hian sample 1,62, 91,331 an test tawh.

ICMR hian sample test-na atana pawmpui laboratory ramchhung hmun hrang hrangah 1,307 a nei tawh a, sorkar laboratory 905 leh private laboratory 402 a nei tawh a ni.

India rama hripuiin State/UT a nghawng nat ber dawttu  Tamil Nadu-ah chuan hri kai hmuh chhuah thar 6,988 lai an awm leh avangin hri kai 2,06,737 an awm tawh. Tamil Nadu-ah hian hri kai mek 52,273 an la awm laiin enkawl dam tawh 1,51,055 an awm thung a, mi 3,409-in an thihpui tawh a ni.

Covid-19 kai tam berna state Maharashtra-ah chuan mi 3,66,368-in hri an kai tawh a, nimin report-ah pawh kai hmuh chhuah thar 9,251 lai an awm leh. Hri kai mek 1,45,785 awmin thihpui 13,389 an awm tawh a, mi 2,07,194 chu an dam leh tawh bawk.

Dam chhuak rate sanna ber Delhi-ah chuan hri kai hmuh chhuah thar 1,142 an awm leh a, mi 1,29,531-in hri an kai tawh a ni. Hetihlai hian mi 1,13,068 lai chu enkawl dam an ni tawh thung a, 12,657-in an la kai mek bawk. Mi 3,806-in an thihpui tawh thung.