J&K CM-in Home Minister hmu

Jammu and Kashmir Chief Minister Mehbooba Mufti chuan nimin khan New Delhi-ah Union Home Minister Rajnath Singh hmuin, an state mamawh bakah state chhunga tharum thawhna thleng hrang hrang chungchangte a sawipui.

Hruaitu pahnite hi minute 30 chhung an inkawm a, CM hian an state security dinhmun te, boruak muanawm a awm theihna atana state sorkar hmalak dante a hrilh a ni.

Home Minister Rajnath Singh chuan Jammu and Kashmir-a muanna a awm theih nan sorkar laipui chuan state sorkar chu a thawhpui zel tur thu a lo hrilh a ni. Meeting-ah hian tunhnaia home ministry-in a din, ramri bul vela chengten harsatna an tawh ṭhin dan zirchiang tura din, study group chungchang pawh an sawidun a ni. Home Minister chuan tunhnaiah J&K-ah hian security force chuan nitin firfiak 5-6 vel an kaphlum ziah niin a sawi.

Kashmir Valley-ah hian tharum thawhna a thleng fo a, security force-te pawhin beih an tawk fo a ni. Nimin pawh khan Pahalgam area-ah mipui thinrim pungkhawmten security force-te an bei leh a, buaina chhuakah hian mi paliin hliam an tuar a ni.

Nimin zing khan Jammu and Kashmir-a Rajouri leh Poonch district-a Line of Control-ah Pakistan sipaite chuan inkahhai thuthlung palzutin silai an hmetpuak leh. Pakistan sipaite hian Dhar leh Kangagali bialah India lam hawiin silai an hmetpuak a, India sipaite hian an chhanglet ve nghal a ni. Balakote-ah chuan Pakistan-te silai hmehpuahah motor eng emaw zat a chhe bawk a, thi leh hliam erawh an awm hriat a ni lo. Ramri-a silai hmehpuah a nih fo avang hian J&K chuan Pakistan ramri bial chhunga school te chu khar turin a hriattir.