Delhi khawpui boruak bawlhhlawh zual zel

Delhi khawpui boruak chuan bawlhhlawh lam a pan zel a, Thawhṭanni chhun khan Delhi khawpui bo­ruak bawlhhlawlh lam hian Graded Response Action Plan (GRAP) red zone a thleng.

Khawpui boruak bawlhhlawhin ziaawm lam a pan theih loh vang­in Delhi sorkarin boruak bawlhhlawh zel tur venna kawng khat atana a lo enchhin tawh, motor number kawpkim leh kawpkim lo intlan­chhawk tir, odd-even traffic system pawh a hmang leh maithei nia sawi a ni.

Nikum kumtir khan Delhi sorkar chuan ni 15 chhung chu odd-even traffic system hi a en­chhin a, hemi chhung hian traffic tawt lutuk pawh a ziaawm phah hle a ni. He system hian CNG, two wheeler, cab operator-te huam tello mah se a hlawhtling thawkhata ngaih a ni. Mi tam takin public transportation an hman ṭangkai bakah, motor inhmanṭawmte an uar avangin ni 15 chhung fuel hmanral zat pawh a tlahniam hman hle a ni.

Khawpui boruak bawlhhlawh zel avangin Supreme Court-in a ruat, Environment Pollution Prevention and Control Authority (EPCA) chuan Badapur power plant a khar a, diesel generator hman a khap bawk.