EC-in HP inthlan neih tur atan apps tlangzarh

Election Commission chuan Himachal Pradesh assembly inthlan neih tur pualin Thawhlehni khan application thar a tichhuak a, hei hi inthlan buaipuina felfai zawka kalpui a nih theih nana electoral officer-te hman tur a ni.

He apps hi RONET tih vuah a ni a, kumin kumtir lama Punjab inthlannaah khan constituency ṭhenkhatah lo enchhin a ni tawh.

Commission chuan RONET hi MIS decision support system software a nih thu sawiin, Chief Electoral Officer (CEO), District Election Officer (DEO) leh Returning Officer (RO) te chu awlsam takin an hriat tur pawimawhte hriattir an ni ṭhin dawn a, anni hian hemi hmang hian thutlukna te an lo siam thei dawn a ni, a ti. Official-te hi polling staff dah zat te, EVM, VVPAT leh disability database, counting centre, polling stations leh critical polling booth chungchangte hrilh hriat vek an ni ang.

Inthlan hunah presiding officer-te chuan dan leh thupek palzutna awm te, EVM/VVPAT ṭha lo awmte chu mobile app aṭang hian an report zung zung thei dawn a, heng message te hi Sector Officer, RO leh DEO-ten lo hmuin, a siamṭhat hna an thawk nghal zel thei dawn a ni.

RONET hi mipui nawlpui pawhin an hmang thei dawn a, inthlan kaihhnawih thil leh, model code of conduct palzut chungchanga complaint-te pawh an thehlut thei ang. Electoral roll-a hming awm zawn nan pawh a hman theih bawk ang.