Kerala CM-in zirna ina Hindi hman rawt chungchangah Prime Minister Narendra Modi inrawlh turin a ngen

Kerala chief minister Pinarayi Vijayan chuan Parliamentary panel-in technical leh non-technical higher educational institution zawng zawnga medium of instructiona tana Hindi hman a rawtna chu duh loin, Hindi chauh ni lo national language zawng zawng hman theih a ni tur a ni, a ti.

Chief Minister Vijayan chuan hemi chungchangah hian prime minister Narendra Modi chu lehkha thawnin, higher institution-a main language-ah Hindi hi hman luih tir a ni tur a ni lo tiin, inrawlh turin a ngen.

Kerala CM hian zirna inah Hindi hmang vek tura rawtna siam hi a twitter-ah pawh sawisel zuiin, he ruahmanna hian India mi tam tak zirna leh hna zawnna kawngah harsatna a siam thei dawn niin a sawi. Inpumkhatna tichhe thei a ni tiin, dodal a ṭul thu a sawi lang bawk.

Union home minister Amit Shah kaihhruai Committee of Parliament on Official Language chuan Hindi ṭawng hmanna state-a technical leh non-technical higher education institute-ah inzirtirna, medium of instruction atan Hindi ṭawng hman a, hmun dangah chuan an tualchhung ṭawng hman a rawt a ni. Committee hian thla hmasa khan president Droupadi Murmu hnenah report thehlutin, state tinah chuan English aiin an tualchhung ṭawng hmang uar turin a rawt bawk.

Committee chuan an rawtna siam hi National Education Policy (NEP) thar zulzuia siam a nih thu a sawi. Zirna in ahHindi hman a rawt bakah, central sorkar hnuaia office, ministry leh department hrang hrangah pawh letter, fax leh email-ah pawh Hindi emaw, tualchhung ṭawng emaw hman a rawt bawk. Central sorkar hnuaia event buatsaihah pawh Hindi emaw, tualchhung ṭawng emaw chauh hman ni se a ti bawk a ni.