Gambia naupangte thihna chhan ni theia puh Khuh damdawi siamtute an damdawi siam tihtawp tir

World Health Organisation (WHO)-in Gambia rama naupang 60 chuang thihna chhan ni theia a puh, khuh damdawi pali siamtu Maiden Pharmaceuticals chu thuneituten an damdawi siam an tihtawp tir.

Haryana state health minister Anil Vij chuan an state-a Sonepat khuaa Maiden factory hi thuneituten an enfiah hnuah, dan zawm ṭhat loh 12 lai an nei tih hmuhchhuah a nih thu sawiin, damdawi siam hna pawh titawp tura tih a ni, a ti.

Maiden Pharmaceuticals siam khuh damdawi pali - Promethazine Oral Solution, Kofexmalin Baby Cough Syrup, Makoff Baby Cough Syrup leh Magrip N Cold Syrup-ahte hian phal tawk chin aia tam diethylene glycol leh ethylene glycol hmuh niin, hengte hian mihring tana hlauhawm, kal (kidney) tichhe thei a ni tih WHO chuan kar liam ta khan a tarlang.

Union health ministry chuan Gambia rama thawnchhuah, khuh damdawi palite sample hi federal laboratory-ah enfiah vek an ni dawn tih a lo sawi tawh bawk a ni. Heng damdawite hi India ram chhungah zawrh chhuah an ni lo a, Gambia ramah chauh thawnchhuah tura phalna pek an ni. Mahse WHO chuan informal market kaltlangin, Gambia bakah ram dangah pawh thawn darh a nih mai theih thu a sawi.

Gambia police-te chuan naupang 69-te thihna thleng chungchang a chhuinaah, heng naupangte hi an kal a chhia niin Thawhlehnia report hmasa a tihchhuahah a tarlang a, hei hi India ram aṭanga lakluh khuh damdawite nen hian inzawmna a nei niin a sawi a ni.

Haryana drugs controller leh Central Drugs Standard Control Organisation (CDSCO)-ten joint inspection an neihah, Maiden hian an damdawi siamah hian propylene glycol, diethylene glycol leh ethylene glycol-te hi quality testing pawh a nei lo a, propylene glycol ṭhenkhat phei chu manufacturing leh expiry date pawh a awm lo niin an sawi.