Rajnath Singh-a'n Kargil indonaa sipai thite zahna hlan

Union defence minister Rajnath Singh chuan nimin khan Kargil indonaa ram tana nunna hlantu, sipai martarte hriatrengna pualin National War Memorial-ah zahna chibai a buk. 

Singh bakah hian union home minister Amit Shah, minister of state for defence Shripad Naik leh Armed force hotulu pathumin zahna chibai an buk ve bawk a ni. Nimin kha Kargil indonaa India-in hnehna a chan champha vawi 21-na a ni a, hemi pual hian ram hruaitute chuan ram tana sipai nun chante zahna chibai an buk a ni.

Kum 1999 May thla aṭang khan India leh Pakistan chu  Jammu and Kashmir-a Kargil district-ah an indo a, Kargil hi India leh Pakistan ṭhenhran a nih hma 1947 hma lam khan Ladakh-a Baltistan district-a awm a ni ṭhin. Kashmir War (1947-1948) hmasa ber hnu khan Line of Control (LoC) chuan a ṭhen hrang ta a, Ladakh-a district pakhat angin a awm zui ta a ni. Kargil-a Drass leh Batalik hmunah te chuan kum 1999 khan Pakistan sipaiin awmhmun khuar tumin ṭan an la a, he an hmalakna hi "Operation Al-Badar" tih a ni. 

Hetianga India ram chhunga Pakistan sipaite rawn inkhuar tum hi India chuan a lo do let a,  beihpui thlak ve nghalin hei hi  "Operation Vijay" tih a ni thung. Ni 60 vel an indo hnuah July 26, 1999 khan Pakistan chu a tlawm zui ta a ni. July 26 hi kum tinin Kargil Vijay Diwas atan hman a ni zui ta bawk.