PM-in J&K-a sipaite bulah Diwali hmang

Prime Minister Narendra Modi chuan nimin khan Jammu and Kashmir-a Gurez Valley a thleng a, Line of Control bula sipai duty-te Diwali a hmanpui.

PM Modi hi Army chief General Bipin Rawat, Northern Command chief Lt General Devraj Anbu leh Chinar Corps Commander Lt Gen J S Sandhu-ten an ṭawiawm a ni.

Modi hian kum 2014 khan tuilian nasa tak tuartu, Kashmir Valley mipuite chu Diwali a lo hmanpui tawh a, kum 2015 khan Punjab-a India-Pakistan border-ah a hmang bawk. Kum 2016 Diwali khan Himachal Pradesh-a Kinnaur district-ah Indo Tibetan Border Police (ITBP), Indian Army leh Dogra Scouts te chu hun a lo hmanpui tawh bawk a ni.

PM hian Diwali lawmna hun hman zawhah Indo-China border-a Mana post tlawh a tum a, vawiin hian Kedarnath shrine pawh a tlawh dawn a ni. Kum 2013 khan tuilianin Kedarnath hi a tichhe nasa hle a, PM hian Kearpuri thar siamna tur lungphum pawh a phum nghal ang.

Defence Minister Nirmala Sitharaman-i chuan Andaman and Nicober Island-a sipai awmte chu Diwali hi a hmanpui bawk a ni.

External Affairs Minister Sushma Swaraj-i chuan Diwali pual hian medical visa dilna tihkhawtlai mekte chu pek vek an nih tur thu a sawi. Pakistan mi, Kashif-an India ramah a fapa enkawl a nih theih nana medical visa a dil pawh pechhuak turin Islamabad-a Indian High Commission a hriattir. Anni bakah hian Pakistan mi dang ṭhenkhat, India ram damdawi-in pan duha visa dilte pawh pek an nih tur thu a sawi.

President Ram Nath Kovind leh Prime Minister Narendra Modi te chuan nimin kha Diwali hmangtute duhsakna an hlan a, Diwali chu boruak tibawlhhhlawh lo zawnga hlim taka hmang turin mipuite an sawm. President chuan he ni pual hian midangte ngaihsak tur leh, eng kut hman rual hian ram leilung pawh ngaihsak turin a ngen. PM Modi pawhin mipuite duhsakna hlanin, hlim leh hrisel taka hun hmang tura a duhsak thu a sawi.

Diwali, Deepavali tih bawk hi Hindu festival pawimawh tak a ni a, ram pumah pui taka lawm ṭhin a ni. Festival of lights an tih, Diwali hi Nepal, Malaysia, Mauritius leh Pakistan-a Hindu-ten an lawm ṭhin bawk a ni.