Bofors chungchangah BJP-in Congress bei thar leh

US-a private detective, Michale Hersham-an Bofors scam chung­chang a chhuinaah, hetih hunlaia Rajiv Gandhi kaihhruai sorkarin a thil chhuinaah a tibuai nia a sawi vangin BJP chuan Congress party a bei thar leh.

Union Minister Smriti Irani chuan press conference a neihnaah, Michael Hershman-an a puh chung­changah Congress chu insawifiah tura a phut thu a sawi.

Hershman hian a interview-naah, Bofors scam chungchang hi hetih hun laia finance minister VP Singh chuan chhui turin a ngen a, mahse a hnuah thamna te pek an tum bakah, thaha vauna te a tawk niin a sawi. Finance minister hi defence ministry-ah sawn a ni ta bawk a ni, a ti.

Central Bureau of Investigation (CBI) chuan Hershman-an Bofors scam chungchang a thilsawi hi a enfiah leh dawn tih a sawi.

US based private detective firm,Fairfax-a president Hershman hi kar hmasa khan private detective conference-a thu sawi turin India ramah a rawn zin a ni. Hershman chuan Bofors laipui leina tura thamna sum tam tak chu Swiss account-ah dah luh a nih thu a sawi. Irani chuan a thusawi aṭang hian Bofors sca chungchanga thil awmdan te hriatbelh a ni, a ti.

Irani chuan Congress chu Bofors scam chung­changah hian hun rei tak a lo ngawi tawh a, tunah chuan he thil thlenga an hruaitute inhnamhnawih dan chungchangah chhanna a pek a hun tawh a ni, tiin a sawi.