DMK-in zirna ina Hindi hman duh lohna lantir dawn

Tamil Nadu-a rorellai, Dravida Munnetra Kazhagam (DMK) hnuaia youth leh student wing-te chuan parliamentary panel-in central educational institute-a inzirtirna atana Hindi ṭawng hman tura rawtna a siam duh lohna lantirin, state pumah nawrh huaihawt an tum.

DMK Youth Wing secretary Udhyanithi Stalin leh Students Wing secretary CVMP Ezhilarasan-te chuan thuchhuah inṭawm siamin, sorkar laipuiin 'Hindi imposition policy' kalpui a tum an duh lohna hi October 15-ah state pumah lantir an tum tih an sawi.

Tamil Nadu chief minister MK Stalin chuan zirna ina Hindi ṭawng hman rawtna hi a lo sawisel tawh a, BPP sorkar hmalak tumna chu ram pum inpumkhatna tichhe thei a ni tih pawh a lo sawi tawh a ni.

Kerala chief minister Pinarayi Vijayan pawhin parliamentary panel rawtna hi sawiselin, Hindi chauh ni lo national language dang zawng zawng pawh hman theih a ni tur a ni tiin, hemi chungchanga inrawlh turin prime minister Narendra Modi hnenah pawh ngenna a lo thlen tawh bawk.

Union home minister Amit Shah kaihhruai, Committee of Parliament on Official Language-in higher education institution, public office leh local court-ahte medium of instruction atana Hindi ṭawng hman a rawtna hian sawizui leh sawisel a hlawh chho hle.