Diwali : Puakthei thil khap vangin boruak a bawlhlawh nep

Supreme Court-in Diwali dawna puaktheihthil zawrh a khap avangin Diwali zawh tuka boruak chu kumdang aiin a bawlh­hlawh nep deuh nia tarlan a ni.

Diwali zawh tuk chiah hian boruak a chhe hle a, mahse kum dang ai chuan boruak hi a ziawm hle a ni tih report chuan a tarlang. Heti chung hian pollution-free Diwali chu kalpui hleih theih a la ni lo a, Diwali zawh tuk pawh hian boruak chu a la bawlhhlawh hle tho a ni. Delhi NCR chhunga hmun tamtak chu boruak bawlhhlawh zawng level a san phah hle tho bawk. RK Puram-ah phei chuan Air Quality Index (AQI) value-ah 978-a thleng phak tho a, hei hi mithiamte chuan a hlauh­awm hle niin an tarlang.

Central Pollution Control Board (CPCB) data-a a lan danin AQI value hi Ningani, Diwali ni khan 319 a ni a, Zirtawni tukah erawh kha chuan 342-355 niin, boruak hi a chhe hleah ngaih a ni. Nikumah lam khan AQI value hi Diwali tukah 999-ah a kai chho dawrh a ni. AQI level 0-50 hi ṭha a ngaih a ni a, 51-100 hi la ṭha viau thoa ngaih a ni. 101-200 hi pangaiah ngaih a ni a, 201-300 hi mihring tana hrisel lo tawh loa chhut a ni. 301-400 hi chhe hleah ngaih a ni a, 400 chunglam phei chu mihring hriselna atana hlauhawm­ah ngaih a ni. AQI level hi a san viau chuan mihring tan a hlauh­awmin thawk lama thleng pawha harsatna thlen thei a ni.

Diwali avanga boruak chhia avang hian nikkum khan Delhi-NCR chhunga school awmte chu nithum chhung khartir an ni a, National Green Tribunal phei chuan Delhi-ah hian emergency a puang hial a ni.

Supreme Court-in boruak bawlhhlawh dan thli thlai tura a ruat Environment Pollution Prevention and Control Authority-te chuan Nilaini khan Delhi-ah hian diesel generator reng reng hman a lo khap hial tawh a, hei hi a chhan chuan boruak bawlhhlawh zawngin "Red Zone" a thlen vang a ni.

Mumbai pawh a boruak a thianghlim lo hle a, mahse Delhi ai chuan a ziawm zawk a, AQI level hi 316 niin nikuma a level a pel ve thung a ni.