ECI-in : Himachal Pradesh assembly inthlan hun tur puang

Election Commission of India (ECI) chuan nimin khan Himachal Pradesh state assembly inthlan neih hun tur a puang.

Chief election commissioner Rajiv Kumar chuan nimin khan press conference koin, state inthlan neih hun tur hi a puang a ni. Covid hri leng chu buaipui ngai a ni tawh lo a, hemi rual hian fimkhur chhunzawm zel erawh a ngai a ni, a ti.

Himachal Pradesh assembly inthlan hi thawh khata neih a ni dawn a, November 12-ah vote thlakin December 8-ah vote tlate chhiarin result puan a ni ang. Inthlan neih tur chungchanga hriattirna hi October 18-ah tichhuakin, inthlan chuh tumte tan October 25 thleng nomination paper thehlut theih a ni dawn a, October 29 thleng inhnukdawk duhte tan hun hawn a ni ang.

CEC chuan Himachal Pradesh-ah hian kum 100 chunglam voter 1,184 an awm tih a sawi a, kum 80 chunglam, rualbanlo leh Covid hri kaite chu postal ballot hmanga vote thlaktir an ni dawn a, an vote thlak lai hi video-a lak vek a ni ang, a ti.

Himachal Pradesh assembly-ah hian seat 68 awmin, BJP-in seat 45 leh Congress-in seat 20 an nei mek a ni a, chief minister Jai Ram Thakur kaihhruai BJP sorkar a ding mek a ni. Vote nei nuai 55.07 an awm a, an zingah hian vote nei thar mi nuai 1.63 an tel. Sorkar siam turin seat 35 neih tlin a ngai.

Vote thlakna tur polling station tin chu ground floor-ah siam vek a ni dawn tih Kumar chuan a sawi a, hmeichhe hlangin an enkawl polling station pawh siam niin, security staff pawh hmeichhia vek dah an ni ang, a ti. Assembly constituency tinah hmeichhe pual bik polling station hi pakhat tal siam ṭheuh tum a ni.

Inthlana chuh tum, candidate-te chanchin, thil neih zat leh criminal record chungchang pawh voter-ten an hriat vek theihna turin 'Know Your Candidate' app siam a ni dawn bawk.

Nimin khan Gujarat assembly inthlan neih hun tur puan tel nghal rin a nih laiin, ECI hian a puang tel rih lo a ni. Gujarat Assembly term hi nakkum February 18-ah a tawp dawn a ni.

Election Commission hian tun hnaiah assembly inthlan neih tur atana an inbuatsaih dante enin heng state pahnihte hi a lo tlawh tawh a ni.