Iraq-a mi 39 bo chhungte DNA sample la

Ministry of external Affairs chuan 2014 June thlaa India mi 39 Iraq-a chin hriat loha bo ta chhungte DNA sample lak hna chu a ṭan a, hei hian an chhungkhatte tan beiseina thar a siam hle beisei a ni.

Iraq-a bo ta chhungte leh an ṭhian hnaite chuan sorkar lamin thuthar a nei nia ngaiin beiseina an nei sang hle a, thuchiang an la neih loh avanga la tlangzarh lo mai an niah ngaiin, thuchiang an neih hunah an tlangzarh vat an beisei tih an sawi.

Sorkar official pakhat chuan Sushma Swaraj-i'n state pali chief minister te a biak tawh thu leh heng zingah hian Punjab CM pawh a tel thu a sawi a, hei hi kalphung pangai niin, Iraq sorkar chuan India sorkar chu DNA sample hi a pek a ngai a ni, a ti. 2014-a India mi Iraq a an bo hnu hian Iraq sorkar leh India sorkar hi an inbe pawp reng a, thil thlen dan chiang zawka an chhui theih nan heng DNA sample-te hi an mamawh thu a sawi bawk a ni.

India sorkar official-te chuan heng mi 39-te hi an thi nge an dam tih tun thlengin hriat a la nilo tih a sawi. Kum 2014, June thla khan India ṭhalai 40 rual, Mosul, Iraq-a construction company-a thawkte chu an bo thu report a ni a, Islamic State te'n heng mite hi an hren thu June 11, 2014 khan an puang zui a ni. An zinga pakhat hi Punjab-ah rawn haw leh in, vanneih thlak taka a ruka a tlanchhuak thei a nih thu a sawi. Midang 39 chu tun thleng hian chin hriatlohin an la bo ta a ni.

External Affairs Minister Sushma Swarai-i chuan heng mi bote hi an thi ngei a ni tih finfiahna a awm hma chuan thiah puan an nih loh tur thu, June thla khan Parliament alo hrilh tawh a ni.

Tarlan dan chuan US leh Syrian sipaiten IS capital Raqqa an chhuhsak hnu khan thlan tam tak hmuhchhuah a ni a, DNA sample an lakte hian heng thlanah hian mil a neih leh neih loh an finfiah dawn a ni.