Exise Policy scam : CBI-in thu zawhfiah turin Delhi Dy CM ko

17th October, 2022

Central Bureau of Investigation (CBI) chuan Delhi excise policy kalpui danah thil fel tawk lo awm nia sawi a chhuina kal zelah, Delhi deputy chief minister Manish Sisodia chu vawiina thu zawhfiah turin a ko.

Central agency hian Aam Aadmi Party (AAP) hruaitu hi vawiin chawhma dar 11-ah an headquarters-ah kal turin a ti a ni.

Sisodia chuan CBI-in a koh thu hi nimin khan a twitter-ah tarlangin, "CBI hian darkar 14 chhung ka in an dap tawh a, mahse an duh ang engmah an hmu lo. Hemi hnuah ka bank locker dap lehin engmah an hmu chhuak chuang lo. Kan khuaahte pawh an duh ang engmah an hmu lo a, tunah CBI headquarter-a inlan turin min ko leh a ni. Min koh angin ka kal ngei dawn a, ṭha takin ka thawhpui zel ang," a ti.

CBI hian Excise Policy kaihhnawihah hian mi eng emaw zat thu an lo zawtfiah tawh bawk a, an zingah hian Indo Spirits neitu Sameer Mahendru, Buddy Retail Private Limited director Amit Arora leh India Ahead News managing director Mootha Gautam-te pawh an tel.

AAP worker leh entertainment and event management company CEO hlui Vijay Nair leh, Hyderabad-a sumdawng Abhishek Boinpally chu CBI hian an man tawh bawk a ni.

Excise Policy hi Delhi sorkar chuan a titawp tawh a, hetih lai hian Gujarat assembly inthlan neih turah AAP boruak a san chhoh zel avangin BJP chuan he policy hi an party beihna atan a hmang niin AAP chuan an puh. Party senior leader, Saurabh Bhardwaj chuan CBI hian Sisodia chu an man ngei a rinawm thu nimina press conference a neihah a sawi a, "BJP hi an hlauthawng tawh a ni," a ti.

AAP chuan he policy chungchangah hian thil dik lo engmah a awm lo tih sawiin, BJP chuan politics lama phuba lakna atan a hmang a ni, an ti. AAP hotu lu ber, Delhi chief minister Arvind Kejriwal pawhin CBI-in Manish Sisodia in leh a thil neihte an dapnaah pawh thil dik lo hmuh a nei lo tih sawiin, heti chung hian prime minister Narendra Modi leh a kaihhruai, central-a BJP sorkar chuan CBI chu dik lo taka hmangin, AAP hnathawh ṭhatte danna turin an hmang a ni, tiin a sawi.