Odisha-in contract-a chhawr mi 57,000 te dah nghet dawn

Odisha sorkar chuan state sorkar hnuaia contractual basis-a chhawr mek, mi 57,000-te chu an hnaah a dah nghet dawn a, contractual basis chu tihtawp a tum bawk.

Chief minister Naveen Patnaik chuan contract-a thawkte dah ngheh an nih tur thu hi sawiin, hemi atan hian state sorkar chuan kum khatah Rs vbc 1,300 a sen belh dawn a ni.

CM Patnaik chuan state ṭhenkhat sorkar chuan hnathawktu regular-a lak hi an ti ṭha duh tawh lo nia sawiin, "Mahse Odisha-ah chuan contractual recruitment hi kan titawp zawk dawn a ni. Hei hi thawktu 57,000 velin an chhawr ṭangkai dawn a ni," tiin kum 2013 aṭang khan Odisha hian contract-a thawktu lak hi a kalpui ṭan tih a sawi.

"Tunah chuan kan state economy pawhin hma a sawn chho zel a, Odisha chuan hmasawnna kawngah kawng thar zawhin, state tana chhinchhiah tlak hun rangkachak a ni dawn a ni," a ti. Sorkar hnathawk zawng zawngte chu theihtawpa thawk turin a chah zui a, an hnathawhna kawngah 5T - Teamwork, Technology, Transparency, Time leh Transformation-te zawm ṭha turin a chah bawk.