Myanmar-in a raltlante a la let tur a ni

Union foreign minister Sushma Swaraj chuan Pathianni khan Myanmar a buaina chhuak chungchang sawiin raltlante chu Rakhine state a an let leh a ṭul thu a sawi a, India chuan he buaina thleng hi pawi a tih takzet thu a sawi bawk.

He thu hi Dhaka, Bangladesh-a joiny consultative commission meeting an neih zawha press conference-ah a sawi a ni.

Foreign Minister hian Bangladesh Prime Minister Sheikh Hasina nen Rohingya buaina chungchang sawipuiin Myanmar hian a ram mi te hi a la let leh tur a ni, Bangladesh tan phurrit lian tak an ni, a ti.

Hasina press secretary chuan Sushma Swaraj hian Bangladesh in an dawh reng theih loh thu leh buaina chinfelna zawn a ṭul nia a sawi thu a tarlang bawk.

Sushma Swaraj hian India-in Rakhine project hi sum leh pai bakah thildang hmanga a ṭanpui thu a sawi a, Kofi Annan-led kaihhruai Special Advisory Commission pawh an thlawp thu a sawi bawk.

India leh Bangladesh hian terrorist beihna kawng pawh sawi dunin ram chhung leh ram pawn aṭanga buaina hrang hrang lak aṭanga mahni ram humhim an duh thu an sawi bawk a ni.

India hian September thla khan 'Operation Insaniyat' Bangladesh Cox Bazaar-a raltlan nuai chuang awmte ṭanpui nan alo kalpui tawh a, nitin mamawh hrang hrang buhfai, dal, chi, chini, tel, thingpui, bawnghnute, thosilên leh sahbawn chu mi nuai thum chuang tan an sem tawh a ni.

Bangladesh-ah hian Myanmar aṭang in Rohingya Muslim raltlan nuai ruk chuang an awm mek a, August thla aṭang khan Rakhine a Myanmar sipaiin beihpui a thlak avanga raltlan an ni. Myanmar hian Rohungyas te hi a ram mipuiah a pawm thei lo a, Bangladesh aṭanga dan lo a an rama lutah an ngai a ni.