Congress Party President thar tur thlang

Congress party President thar tur chu nimin khan party palaiten an thlang a, kum 20 chuang hnuah Congress chuan Gandhi chhungkua mi ni lo party president atan a nei dawn ta a ni.

Party President thlannaah hian candidate pahnih Shashi Tharoor leh Mallikarjun Kharge an awm a, candidate pahnihte hian inthlan result chu an pawm tur thu leh, an party tan theihtawpa an thawhdun zel tur thu an sawi. Party hruaitu thlannaah hian official candidate an awm hran lo tih pawh an lo sawi tawh a, mahse Kharge hi Gandhi chhungkua leh party senior leader-ten an thlawp zawk nia sawi a ni a, tling tura rin kai zawk a ni bawk.

Lok Sabha inthlanpui ṭum hniha Congress party hi an chet chhiat zawn avangin kum thum liam ta khan Rahul Gandhi chu party president a nihna aṭangin a bang a, hemi hnu hian Congress party president nghet hi an la awm leh lo. Rahul Gandhi hi party president atana awm zui turin nawr mah se a hnar zel a, hei vang hian a nu, Sonia Gandhi chu interim president atan dah a ni.

Nimin zing dar 9 aṭangin vote thlak ṭan a ni a, tlai dar 4 thleng vote thlak hun hi hawn a ni.

Tun ṭum hi Congress party-in kum 137 dawn chhunga party president thlanna a buatsaih ṭum rukna a ni a, kum 1939, 1950, 1977, 1997 leh 2000-ahte inthlan hi an lo nei tawh a ni. Party hruaitu thar hi palai 9,000 chuang awmna, Pradesh Congress Committee (PCC) delegate-ten an thlang. Delhi-a AICC headquarters-ah vote hi thlakin, state hrang hranga delegate-te hian an state khawpuia polling station-ah vote an thlak bawk. Polling booth hi 65 chuang siam a ni. Ballot box-te hi vawiin hian Delhi-ah an thleng ang a, naktukah vote tlate hi chhiarin result puan a ni ang.

Party hotu, Sonia Gandhi leh Congress general secretary Priyanka Gandhi Vadra-te chuan Delhi-a AICC headquarters-ah vote an thlak a, hetih lai hian Rahul chu 'Bharat Jodo Yatra' a neih mek avangin campsite-ah vote hi a thlak ve thung ang. Bellary-a Sanganakallu campsite-ah polling station hi siam tel a ni.

Sonia Gandhi hi party president ni rei thei ber niin, kum 1998-2017 inkar bakah kum 2019 aṭang khan he dinhmun hi chelhin, kum 20 chuang party president a ni tawh. Kum 2000-a party president thlannaah khan Sonia Gandhi hian delegate vote 7,700 zinga 7,448 hmuin, a khingpui Jitendra Pradas chuan vote 94 chiah a hmu.

Kharge hi thlan tlin a nih chuan Congress party-a kum 50 chhunga Dalit leader pahnihna tur a ni ang.