Health Ministry-in Covid vaccine lei belh tawh dawn lo

Union health ministry chuan Covid vaccination programme a kalpui mek chu a hmawr a bawk hnai tawh a, vaccine hi a thar lei belh a tum tawh rih lo. Hei vang hian kum 2022-23 budget-a vaccine leina atana sum dah aṭanga 85% dawn la bang, Rs vbc 4,237 chu Finance ministry hnenah a pe let.

Official lamin an sawi danin, sorkarin vaccine a lei sa hi dose vaibelchhe 1.9 chuang awmin, hengte hi sorkar laipui leh state sorkarten an kawl a, an lei khawl sa hian thla ruk a la daih dawn a ni. Covid hri leng a ziaawm chhoh zel avangin vaccine la pawh hi an tlahniam tawh hle.

Sorkarin vaccine a stock hi a zo a nih pawhin, damdawi dawr lamah lei tur a awm reng dawn tho a ni.

"Government channel kaltlanga vaccine lei emaw, budget siam thar leh emaw chu thla ruk hnuah ram chhunga Covid-19 hri legin dinhmun a zirin siam thar leh a ni ang," tiin official chuan a tarlang.

Covid vaccine pekchhuah hna kalpui mekah, nimin zing thleng khan vaccine hi dose 2,19,33,43,651 pekchhuah a ni tawh. Puitling zingah 98% in dose khatna hi lain, dose hniha la hi 92% an awm bawk. Kum 15-18 inkar zinga dose khatna la 83.7% awmin, dose hniha la hi 72% an awm bawk a ni. Kum 12-14 inkar 87.3% in vaccine dose khatna la tawhin, dose hnihna la hi 68.1% an tling. Hei bakah hian booster dose, precaution dose la hi 27% an awm tawh bawk.