Sorkarin tourism lamah hma lak nasat tum

Union Tourism Ministry chuan kumkhat chhunga foreign tourist awm zat maktaduai 14.4 chu kum nga chhung a, maktaduai 40-ah a kaichhoh theih nan hmalak a nih tur thu a puang.

Sorkar ruahmannaah hian national tourism board din te, airport pawimawhah foreign tourist lo thleng lo lawmna hmun siam te, khawvel pawhin a hriatpui hmun hmingthangte tun aia tihchangtlun leh hmuh nuam zawka siamte a tel. Hei bakah hian private sector lam pawh helam kawnga hma la tura sawm te a tel a ni.

Union Tourism minister KJ Alphonse chuan tourism sector-a eizawng awm zat mi maktaduai 43 chu, kum 2022-ah chuan maktaduai 100-ah a kaichhoh theihna turin hma lak a ni ang, a ti. Kum nga lo awm leh turah chuan, ram dang khualzin maktaduai 40 chuang kum khat chhunga India-ah an lo luh theih nan hmalak an tum thu a sawi bawk.

Tourism Secretary Rashmi Verma pawhin airport tihchangtlun kwngah nasa zawk hmalak an tum thu leh clearance pawh chak zawka kapui a nih theih nana hmalak a nih tur thu a sawi. Delhi, Mumbuai, Chennai leh khawpui lian danga airport-ahte khualzin mi lo thlengte lo lawmna hmun siam a nih tur thu a sawi bawk.

Archeological Survey of India hnuaia awm mek world heritage site-te pawh tun aia tihchangtlun a nih tur thu leh khualzin mite tan pawha tlawh chakawm zawka siam a nih tur thu tarlan ni bawk. Hemi atan hian scheme thar Adopt-a-monument pawh duan a ni. Verma chuan hemi scheme hnuaia kalpui tur site pasarih an thlan tawh thu a sawi bawk.