CBI-in AAP chhuahsan turin an nawr tih Sisodia-a'n a sawi

Delhi deputy chief minister Manish Sisodia chuan Central Bureau of Investigation (CBI) chuan Aam Aadmi Party (AAP) chhuahsan a, Bharatiya Janata Party (BJP) zawm turin an nawr niin a sawi.

Thawhṭanni khan CBI hian Delhi excise policy kaihhnawihah Manish Sisodia hi thu zawhfiah tura koin, darkar kua zet thu an zawt a ni.

CBI-ten thu an zawh hnuah chanchinthar lakhawmtute a kawmnaah, Sisodia chuan AAP chhauhsan tur zawnga nawr a nih thu leh, Delhi chief minister post-a dahah an thlem thu a sawi. "BJP chuan excise policy chungchangah sum tihchingpen Rs vbc 10,000 a awm niin an sawi. Mahse CBI office-ah hian hetianga sum tihchingpen a awm loh thu leh, case pawh hi phuahchawp mai a ni tih ka hmu a ni. Ka laka case an siam pawh hi BJP-in Delhi-a 'Operation Lotus' a kalpui tihhlawhtlinna tura min phiarrukna a ni," a ti.

'Engvangin nge AAP-a ka awm tihte min zawt a, he party hi ka chhuahsan chuan Delhi CM post-te min zawrh a ni. Jail-a tantir ka nih theih thu leh, case siamsak zel ka nih theih thute min hrilh bawk. Mahse politics hi Chief Minister nih tum vanga khel ka ni lo a, rinawm taka thawk tura zawm ka ni tih ka hrilh," tiin Sisodia chuan a sawi. BJP chu 'party tenawm tak' tia sawiin, AAP chhuahsanin BJP a zawmna chhan tur a hriat loh thu a sawi bawk.

"An case siamah hian ka tih dik lohna engmah a awm lo tih ka hrilh a, anni pawhin Satyendra Jain pawh case siamsak a ni lo tih min hrilh. Mahse Jain jail-ah an tantir tho si a ni," tiin Sisodia chuan a sawi.

Enforcement Directorate chuan Delhi health minister leh AAP hruaitu, Satyendar Jain leh midang pahnih chu kum 2017-a CBI FIR thehluh tlawhchhanin, Prevention of Corruption Act hnuaiah an lo man tawh a ni.

AAP chuan Himachal Pradesh assembly inthlan neih turah Jain hi an party in-charge atan ruat a ni a, hei vang hian BJP chuan AAP campaign tur danna atan hian chhuanlam dang siamin Jain hi a mantir niin an puh.

Hetih lai hian CBI chuan Sisodia-a'n AAP chhuahsan turin an ngen nia a puhna chu thu dik lo niin an sawi thung. Thuchhuah an siamah, " CBI chuan heng puhna hi a pawm lo a, Sisodia hi FIR thehluha an puhna hrang hrangah dan ang thlapin thu zawh a ni. He case chhui hna hi dan ang takin chhunzawm zel a ni ang," an ti.