Sushma Swaraj leh Rex Tillerson-te'n Pakistan dem

India External Affairs Minister Sushma Swaraj leh US Secretary of State Rex Tillerson-te chuan Nilaini khan inkawmna hun an nei a, Pakistan chu terrorist-te tan hmun him tak a nih thu sawiin, an dem thu an sawi.

Ram hruaitu pahnihte hi darkar khat leh a chanve dawn an inkawm a, thil tam tak an sawi dun a ni. Rex Tillerson chuan Washington-in Islamabad lakah beisei a neih thu sawiin, terrorist-te tana hmun hima an siam reng chuan en liam mai mai an nih loh tur thu a sawi a ni. An inkawmnaah hian Pakistan-ah terrorist an tam thu a sawi. Tillerson pawn Pakistan chu terrorist-te tan hmun him a nih thu sawiin, Pakistan sorkar chu terrorist chung­chang sawi ringawt lova action la ngei tura a beisei thu a sawi a ni. Pakistan nen hian a ṭha zawnga thawhdun an duh tih a siaw bawk.

An inkawm zawh hian Sushma Swaraj-i chuan, US President Donald Trump-a policy 'South Asia Strategy' chu hlawhtling taka kalpui a nih theih a duhsak thu sawiin, Pakistan chuan thlei bikna nei hauh lova a ram chhunga terrorist awmte lakah action a lak a ṭul thu a sawi a ni.

Tillerson chuan pakistan nen hian a ṭha zawnga thawhdun a duh thu sawiin, Thawhlehni-a Pakistan a tlawh ṭum pawhin ram pahnihte thawh dunna tur thil hrang hrang an sawi thu a tarlang. Tillerson hian India-in terrorist a beihna kawngah US-in kawng engkima ṭanpui a inhuam thu a sawi bawk.

An inkawm zawha thutharthehdarhtute an kawmnaah Sushma Swaraj-i chuan, "Ni nga chhunga Tillerson-a'n ram paruk a tlawhkualnaah hian a tawpah a ṭhian hnai tak ram a tlawh a, tunah chuan hahdam takin an ram lamah a haw thei tawh a ni" a ti. Swaraj leh Tillerson hi tunhnaia ṭum hnih an inhmuhna a ni tawh a, thla hmasaa UN General Assembly, New York-a neiah khan inkawmna hun an lo nei tawh a ni.

Swaraj-i hian Pakistan chu a ram chhunga terrorist awm te laka action la ngei tura an beisei thu leh, eng ram mahin terrorist-te hum lo se an duh thu a sawi a, terrorist humtu leh terrorist

ṭanpuitu ram chu hmun hrang hranga harsatna thlengah mawhphurtu an nih thu a sawi. Trump-a secretary nen hian terrorist do na kawngah theihtawp chhuah turin thutlukna an siam a, ram chhung leh khawvel huapa terrorist beihna kawnga thawhdunna kawng ngaihtuah tur hian, kumin December-ah meeting neih nise tiin thutlukna an siam bawk.

Tillerson leh Swaraj-i te hian China chung­chang pawh sawiin, Tillerson chuan India-in Indo-Pacific tuipuia venhimna a kalpui kawngah US chuan theitawp chhuaha a ṭanpui tur thu a sawi a ni. North Korea chungchangah pawh Swaraj-i chuan India-in N. Korea nen sumdawnna kawnga thawhhona chhete an neih thu a sawi a, New Delhi-ah pawh embassy-te takte an neih thu leh, US-in a duh chuan NKorea nena inbiak pawhna atana a hman theih tur thu a hrilh.

An inkawmnaah hian Iran-a buaina hrang hrang awm chungchang te, Afghanistan chungchangte pawh sawiin, Swaraj-i hian Afghanistan rama remna leh muanna a awm theih nan India-in theihtawp a chhuah thu leh, terrorist do letna kawngah US chu puih a inhuam reng thu a sawi bawk a ni.