Congress Party President thar Mallikarjun Kharge

Congress Party President thar atan Rajya Sabha MP, union minister hlui Mallikarjun Kharge (80) chu thlan tlin a ni ta. Kum 24 hnua Nehru-Gandhi chhungkaw mi ni lo Congress party president ni thei hmasa ber a ni.

Mallikarjun Kharge leh union minister hlui vek, Shashi Tharoor-te chuan party president thar thlan tur hi chuhin, October 17 khan party delegate-ten an thlang a ni. Vote thlak hi mi 9,385 awmin, Kharge hian vote 7,897 a hmu a, Tharoor-a'n vote 1,072 a hmu. Vote thi 416 a awm bawk.

Kharge hi Dalit hnam zingah kum 138 chhunga Congress party president ni thei pathumna a ni a, October 25 hian party president thar atan rinawmna thu tiamtir a ni ang.

Union railways minister hlui, Kharge hi party hruaitu thlan hma khan Rajya Sabha-ah leader of opposition a ni a, mahse Congress party hian 'one-man, one-post' policy kalpuina tur a siam thar avangin party president a chuh dawnah October 1 khan Rajya Sabha-a leader of opposition a nihna aṭangin a bang a ni.

Shashi Tharoor chuan party president thlannaah a chak zo lo tih a pawm thu sawiin, Kharge-a chenna inah kalin duhsakna a hlan nghal a ni. Tharoor hian vote chhiar dawn hian party hruaitu thlannaah hian Uttar Pradesh-ah thil fel tawk lo a awm niin party poll panel hotu, Madhusudan Mistry hnenah complaint a lo thehlut a, mahse hei chu party chhung thil a ni a, buaipui zui loa party tana hmalam pan zel a tum thu a sawi.

Andhra Pradesh-a 'Bharat Jodo Yatra' nei mek, Rahul Gandhi chuan an party president thar hian party-a a chanvo tur chungchang chu a la ruat dawn tih a sawi. Congress party-a thutlukna siamtu chu Congress President a ni a, tunah chuan president thar an nei ta a, ani hian party kal zel dan turah pawh thutlukna a siam dawn a ni, a ti.