BJP-in Manish Sisodia narco test neih tir phut AAP-in PM Modi pawh test neih tir ve phut let

Delhi deputy chief minister Manish Sisodia-a'n Central Bureau of Investigation (CBI)-in Delhi Excise policy kaihhnawiha thu an zawhfiah ṭumin, Aam Aadmi Party (AAP) chhuahsana BJP zawm tura an nawr thu a sawi chungchangah, BJP hruaitute chuan Sisodia chu narco test neih tir an phut.

AAP chuan BJP thusawi hi chhang letin, prime minister Narendra Modi chu kum za chhunga dawtsawi nasa ber nia puhin, narco test hi neih tir an phut thu an sawi ve nghal a ni.

West Delhi-a BJP MP, Parvesh Verma chuan Sisodia chu hruaitu rinawm a nih chuan, CBI official-te a puh chungchanga narco test neih emaw, a nihna aṭanga ban emaw chu a remti ngei tur a ni, a ti. "CBI officer zingah BJP zawm tura sawm an awm a nih chuan, Sisodia han officer hming chu a sawilang tur a ni. A nih loh chuan narco test neih emaw, a post aṭanga ban emaw a inhuam tur a ni," tiin a sawi. BJP hruaitu dang, Kapil Mishra pawhin Sisodia-a'n CBI-te a puhna chu an thil chhui mek tihbuai leh midangte rilru hruaikawi a tumna niin a puh ve bawk.

BJP hruaitute thusawi hi chhangin, AAP MLA Saurabh Bhardwaj chuan PM Modi chu dawtsawi reng, 'serial liar' tiin a sawi a, politician zinga dawtsawi nasa ber a ni, a ti. Hei vang hian BJP chuan narco test an neihtir a ngai a ni tiin, "BJP chuan CBI leh ED-te chu tuma thunun loh, neutral institution angin an kal em tih fiahna turin PM chu lie detector test, narcotic test nei turin an zawt ngam em?" tiin a chhang let a ni.