Bihar-a pawl 7 zirlai zawhnaah ramdang angin Kashmir tarlang

Bihar-a pawl 7 zirlaite question paper pakhatah Kashmir chu India ram pawna awm nia an tarlan avangin sawisel a hlawh hle.

Bihar Education Department chuan pawl 1-8 inkar tan midterm examination chu October 12-18 inkar khan a buatsaih a, Araria, Kishanganj leh Katihar district-a pawl 7 English zawhna pakhatah ram panga, China, Nepal, England, Kashmir leh India-a cheng mipuite chu engtinnge an sawi tia zawtin, Kahsmir chu ram hrang angin an ziak a ni.

He thil hian social media lamah pawh sawizui a hlawh hle a, mahse school thuneitute chuan question paper-te hi sorkar school-a hman tura Bihar Education Board-in a siam a ni tih sawiin, a zawhna dik tak chu 'Kashmir-a chengte hi engtinge an koh?' tih zawk tur a ni a, tihsual palh a ni, an ti.