Indo-Pak border-ah airbase thar siam dawn

Prime minister Narendra Modi chuan nimin khan Gujarat hmarlam, India-Pakistan border bula airbase thar siamna tur lungphum a phum.

Banakasantha-a Deesa hmuna airbase siam thar tur chu India ram venhimna kawnga centre pawimawh tak a nih tur thu PM chuan a sawi. Deesa hi international border aṭanga km 130 vela hlaa awm a ni.

PM Modi hian Gujarat khawpui, Gandhingar-ah Defence Expo 2022 a hawng bawk a, he Expo hi India-in defence lam kaihhnawiha a theihna leh thil siamte phochhuah a ni.

Modi chuan defence force chuan ram dang aṭanga lakluh phal loh item 101 a tichhuak leh dawn tih a sawi. Hengte nen hian defence lam kaihhnawih hmanrua 411 chu ram pawn aṭanga lakluh khapin, India ram chhunga siam chauh hman a ni dawn a, hei hian India defence industry pawh nasa takin a tihlen phah dawn a ni, a ti. India defence product thawnchhuah chu kum rei vak lo aṭang khan a let riat zeta a pun thu a sawi bawk.