India leh US-in tuipui venhimna turin HOSTAC hmang dawn

Tuipui-a venhimna khauh zawk a awm theih nan India leh United States chuan Helicopter Operations from Ships Other Than Aircraft (HOSTAC) hman an remti.

He thutlukna hi Nilaini-a ASEAN Defence Minister's Meeting-Plus, Phillipines-a neih­ah khan India Defence Minister Nirmala Sitharaman-i leh US Defence Secretary Jim Mattis te chuan an siam a ni. Pentagon thupuangtu Dana W White chuan ram pahnih­te hian tuipuia venhimna khauh neih a pawimawh zia hriain HOSTAC hi hman a, ram pahnih hi thawdun an tum thu a tarlang.

Sitharaman leh Mattis-te hian international order dan chu a pawimawh zia hriain, ram pahnih te'n terrorist beihna kawnga hma nasa zawka an lak dun theihna turin he thu­tlukna hi an siam tih, White House chuan a tarlang. Mattis hi thla hmasa khan India-ah a rawn zin tawh bawk a, Sitharaman-i nen hian tunhnaiah vawi hnih an inhmuhna a ni ta a ni.

India leh US hian tun hnaiah thawh hona tur kawng hrang hrang an sawi dun nasa hle a, Nilaini pawh khan US Secreatry of State Rex Tillerson leh External Affairs Minister Sushma Swaraj-i chuan inkawmna hun neiin, terrorist dona kawnga hma nasa taka lak dun dan tur an rel tawh bawk a, Tillerson chuan US-in India chu thuam chak a inhuam thu a sawi bawk a ni.

India tuipuiah hian tun hnai mai khan China indo lawng hmuh a ni nual a, hei vang hian India chuan tuipui lam venhimna hi khauh zawka kalpui a tum hle a, indo lawng eng emaw zat inral ring reng tura a tirhchhuah tur thu a lo sawi tawh bawk a ni.