India : Covid-19 vanga thi mi 1,889 tling tawh

India ramah Covid-19 vanga thi chu nimin thleng khan mi 1,889 an tling tawh a, he hri kai hi mi  56,342 an awm tawh bawk. 

Union health ministry-in a tarlan danin, Ningani khan hri kai thar mi 3,390 leh  hri vanga thi mi 103 an awm. Hri kai thar zinga 78% hi Delhi, Gujarat, Maharashtra leh Tamil Nadu-a mi an ni. Covid-19 vanga thi, mi 1,889 zinga 70% hi Maharashtra leh Gujarat-a mi an ni bawk. 

Maharashtra chu India ram state zinga Covid-19 kai leh he hri vanga thi tamna ber a ni. Hri kai thar hi an la pun belh zel avangin an state-ah hian May thla tawp thleng lockdown pawhsei a ni maithei. 

Chief minister Uddhav Thackeray chuan video confe­rence kaltlangin all party  meeting a buatsaih a, lockdown pawhsei chungchang hi an sawiho. A bikin red zone, Mumbai leh Pune metropolitan region-ah chuan kharkhipna hi pawhsei rin a ni a, state chhunga hri kai zinga 90% chu heng biala cheng hi an ni. 

Supreme Court chuan zu lei tum mi tam tak an kalkhawm ṭhin avangin hri thehdarhnaah a chan mai a hlauhthawnawm thu a sawi a, hei vang hian state hrang hrangte  hnenah zu chu non-direct contact emaw, online mawa zawrh dan ngaihtuah turin a ti. 

Justice Ashok Bhusan, Sanjay Kishan Kaul leh BR Gavai awmna bench chuan lockdown hun chhunga  Ministry of Home Affairs (MHA) guideline-in zu zawrh a phalsak chungchang complaint thehluh chu nimin khan video conferencing kaltlangin an ngaihtuah a ni. Bench chuan state-te hnenah zu lei tumte kalkhawm tur venna atan online-a zuar a, home delivery tih dan ngaihtuah turin a ti a ni. Petition thehluttu, Guruswamy Nataraj aiawhtu, advocate Sai Deepak chuan ram chhungah zu dawr 70,000 vel awmin, heng dawr aṭanga zu leitute hian hri laka invenna tura pawimawh, social distancing dan chu an zawm lo hle tih a sawi a ni.