Doctor-ten MP-te puala SOP siam dodal "VIP culture kan duh lo"

All India Institute of Medical Sciences (AIIMS) Delhi Director-in Parliament member nilaite damdawi lama enkawlnaa duhsak bikna tur, standard operating procedures (SOP) a siam chu Federation of Resident Doctors Association (FORDA) leh doctors' association hrang hrang chuan an duh loh thu an sawi.

AIIMS Delhi director Dr M Srinivas chuan Nilaini khan Lok Sabha joint secretary, YM Kandpal hnenah lehkha thawnin, Outpatient Department (OPD), emergency consultation, leh inpatient hospitalisation service-ah MP ṭanglaite tana ruahmanna siam dante hrilhin, hemi hnu hian MP-te puala SOP siam chu tihchhuah zui a ni.

FORDA chuan hemi chungchang hi an twitter-ah tarlang nghalin, "VIP culture hi kan duh loin kan dem a ni. Midangte duhsak vanga dam lo dangin an tawrh kan duh lo," an ti.

Federation of All India Medical Association (FAIMA) pawhin prime minister Narendra Modi chu India ramah VIP culture a awm lo tih a sawi hnuah, AIIMS Delhi Director-in VIP culture kalpuina tur a siam chungchang chu sawifiah turin an phut a, VIP culture chu an dodal zel dawn tih an sawi bawk.

Ram chhung hmun hrang hranga doctor dangte pawhin AIIMS Director thutlukna siam hi an sawisel a ni.

Dr Srinivas hian Lok Sabha joint secretary hnena lehkha a thawnah hian, "Parliament member ṭanglaite hian specialty/super-specialty department OPD-a inentir an mamawh a nih chuan, Lok Sabha/Rajya Sabha secretariat emaw, a personal staff emaw chuan duty officer bia in, a nat dan kimchang leh, a doctor rawn duhte a hrilh ang," tiin a sawi a ni. 

AIIMS Hospital-ah hian duty officer, qualified medical professional chu control room-ah englai pawha biak theih a awm reng tur ni a, officer duty lai chu MP-te enkawlna leh an awmna tur ruahman sak chungchanga nodal officer an ni nghal dawn tih Srinivas chuan a sawi. MP-te hi damdawi-ina enkawl an ngai dawn a nih chuan , a enkawltu chuan medical superintendent hnenah a natdan kimchang thawnin, damdawi-in awm a ngaih chin tura rin pawh a hrilh nghal ang tiin Srivivas chuan a sawi bawk.