Diwali pualin PM-in ṭhalai 75,000-te thilpek pe dawn

Prime minister Narendra Modi chuan Diwali lawmna pualin ram chhung hmun hrang hranga ṭhalai 75,000-te hnenah thilpek, sorkar hna a pe dawn.

PM Modi hian Diwali thlen hma ni hnih, naktukah video conference hmangin ṭhalai rualte hi a kawm dawn a, central sorkara ministry leh department hrang hrang hnuaia hna pekna, appointment letter chu mi 75,000 chuang hnenah hlan a ni dawn a ni.

Hna thar pek turte hi Defence Ministry, Railway Ministry, post department, Home Ministry, Labour and Employment Ministry, Central Industrial Security Force, Central Bureau of Investigation, customs, leh banking hnuaiahte a ni ang.

PM programme hman hi khawpui hrang hrang aṭangin union minister-te pawhin an telpui dawn a ni.

Ram puma unemploy­ment rate sang zel avangin BJP sorkar chuan sawisel a tawk nasa chho hle a, eptu party-te pawhin beihna atan an hmang fo a ni. Prime minister Modi chuan kumin June thla khan thla 18 chhungin hna thar nuai 10 siam a nih tur thu a lo puang tawh a, naktuka a hun hman turah hian sorkar hnaa mi nuai 10 lak tharna tur 'Rozgar Mela' chu a hawng nghal dawn a ni.

Prime Minister Office chuan a hmain ministry zawng zawng hnenah an ministry ṭheuha hna ruak hnawh khah loh awm zat hrechiang tur leh, post ruakte chu hnawhkhat tura hma la turin a lo hrilh tawh a ni.