Bangladesh-a tangkhang thiar chhuak ṭan
Sorkar laipui chuan Bangladesh-a India mi tangkhangte chu nimin aṭang khan a thiar chhuak ṭan.
Nimin chawhma dar 11 khan Hazrat Shahjalal Airport aṭangin mi 168 chu thlawhtheihna hmanga phurh chhuah an ni a, Srinagar-ah dahkhawm an ni. An vai hian Jammu and Kashmir medical student vek an ni bawk.
Coronavirus vanga ram hrang hranga India mi tangkhangte thiar chhuah hna Vande Bharat Mission hnuaia India sorkarin 'repatriation exercise' a kalpui lian ber a ni a,
Bangladesh-a High Commission of India-in thuchhuah a siama a tarlan dan chuan phase hrang hrangin India mi tangkhangte thiar chhuah hna hi kalpui a ni dawn.
Nimina thiar chhuah hna hi a thawh khatna a ni a, a thawh khatnaah hian thlawhtheihna pasarih tirh a ni dawn a, nimin bakah hian Srinagar-a hruai turte bik hi May 12 leh 13-ah thiar chhuah leh tur niin hemi thleng hi thawh khatnaah an pawm a ni.
Delhi-a ṭum tur thlawhtheihna chu vawiin leh Thawhṭanni lo awm turah hian a thlawk chhuak dawn a, May 14 hian Chennai-a ṭum tur a thlawk chhuak leh bawk ang. Thlawhtheihna pakhat hian mi 170 vel zel a phur ang.