JEE (Advanced) leh CBSE Exam hun tur puang

Human resource deve­lop­ment minister Ramesh Pokhriyal Nishank chuan Joint Entrance Examination, JEE (Advanced) chu August 23-ah neih a ni dawn tih Ningani khan a puang. 

JEE (Advanced) hi IIT entrance exam a ni a, tun thla ni 17-a neih tura ruahmanna siam vek tawh ni mah se hripui leng vangin August 23-a neih turin an sawn hla ta a ni.

Ramesh Pokhriyal Nishank chuan JEE-Mains chu July 18-23 inkarah neih a ni dawn tih a sawi a, JEE-Mains hi ram chhung hmun hrang hranga engineering college entrace exam niin JEE (Advanced) qualifying exam anga ngaih a ni bawk. JEE Main exam-a tiṭha nuai 2.5-te chuan JEE Advanced exam hi an pe thei ang. 

National Eligibility-cum-Entrance Test (NEET) chu July 26-ah neih a ni dawn thung a,  Union Public Service Commission (UPSC) chuan Civil Services Preliminary Examination, 2020 May 31-a neih tur chu hrileng vangin tihkhawtlai a ni tawh tih lo sawi tawh bawkin, tun thla chhung ngei hian exam hun tur ni thar puan leh an tum bawk.  

HRD minister Ramesh Pokhriyal Nishank chuan nimin khan Central Board of School Education (CBSE) exam tihkhawtlaite exam hun tur puangin July 1-15 chhungin neih a ni dawn tih a puang.

Hripui leng vanga rampum lockdown a nih avangin ram chhung hmun hrang hranga zirna inte chu loh theih loha khar a ngaih avangin CBSE exam pawh hi tihkhawtlai a ngai a ni.