India leh UAE-in inbiakna nei

India leh United Arab Emirates chuan kawng hrang hranga thawh dunna ṭha neih an neih theihna tur zawngin Abu Dhabi, UAE-ah inbiakna an nei. Tun ṭum hi thawh dunna ṭha zawk nei tura an inbiak vawi hnihna a ni tawh a ni.

Ram pahnih palaite chuan venhimna kawng te, terrorism leh insumdawn tawnna chungchangte an sawi. Minister of State for External Affairs M J Akbar-a'n India ai a awh a, UAE aiawh hian Minister of State for Foreign Affairs Anwar Gargash a tel thung. Inkawmna an neih zawha thuchhuah an siamah chuan, he an inkawmna hi a hlawhtling hle tih an tarlang a ni. Ram pahnih aiawhte hian venhimna, terrosrism, insumdawn tawnna leh technology lama thawh dunna chungchang mai bakah, thil hrang hrang an sawi dun a ni.

Thuchhuah an siamah chuan, UAE-in India rama investment a neihna kawngah a huang a zauh dawn a ni. India aiawh Akbar hian Inrinni khan ni hnih cham turin UAE hi a thleng a, Mohammed Bin Ahmad Al Bawardi, Cabinet Minister leh Minister of State for Defence Affairs mai bakah, chief of the crown prince court, Sheikh Hamed Bin Zayed Al Nahyan pawh a hmu bawk a ni.

Akbar chuan a zin chungchang a sawinaah an ruahmanna siamte chu ram pahnih inkara thawh dunna ṭha a awm zel nana thil ṭangkai tak a nih thu a sawi. Gargash pawn India nen inbiakna an nei thei chu lawmawm a tih thu sawiin, ram pahnih inkarah inzawmna ṭha tak a awm chu lawmawm a tih thu a sawi a ni. Ram pahnih aiawhte hian New Delhi-ah a vawi thumna atan inbiakna neih leh an remtih thu an tarlang bawk.

Inbiakna hmasa ber hi kumin January khan neih a lo ni tawh a ni. Prime Minister Narendra Modi chuan kum 2015 khan UAE hi a lo tlawh tawh a, Crown Prince of Abu Dhabai Sheikh Mohamed bin Zayed Al Nahyan pawhin nikum February leh kumin January thla khan India a rawn tlawh tawh bawk. UAE hi India-in sumdawnna lama a thawhpui lian ber pathumna a ni a, UAE tan India chu a partner lian ber a ni thung.