Ahmedabad Civil Hospital-ah naute 18 thi tawh

Tun hnai ni thum kalta chhung khan Ahmedabad Civil Hospital-ah naute 18 ngawt mai an thi tawh a, he mi avang hian Gujarat Chief Minister Vijay Rupani chuan thil thlen chhan hi chiang zawka chhui a nih tur thu a sawi.

Naute 18 lai mai an thih hnuah Gujarat sorkar chuan an report dawn bawhzuiin heng naute thih chhan hi chiang zawka chhui turin Committee a din dawn tih Pathianni khan a puang a ni.

Chief Minister Vijay Ruapni chuan committe an din tawh thu sawiin, naute heti zat an thih chhan hi chhui chian a ngai a ni, a ti. Committee report chu dawn let leh thuai a beisei thu sawiin a hriat chianah chuan damdawi pek ṭhat loh vang leh damdawiin facility chhiat vang chu a nih loh thu a sawi a ni. Inriini a naute 9 ngawt an thih takah chuan sorkar chuan a enliam mai mai thei lo a, health secretary leh health commissioner-te pawh damdawiinah hian tirh nghal an nih thu a sawi bawk.

Damdawiina naute thi zinga 9 hi damdawiin dang aṭanga sawn luh an nih thu report chuan a tarlang a, a dang 9 hi chu he damdawiina piang hi an ni thung. Inrinni khan naute 9 ngawt mai he damdawi inah hian an thi a, heng zinga pali hi chu damdawiin dang aṭanag admit an ni. Mi ṭhenkhat chuan doctor leh nurse duty an awm loh avanga niin an sawi a, mahse hei hi damdawiin lam thuneitute chuan an pha thung a ni.