Mipuiten Covid an ning tawh, booster dose la duh an awm lo : SII chief

Covid-19 vaccine, Covishield siamtu Serum Institute of India (SII) chief executive officer, Adar Poonawalla chuan nikum December aṭang khan Covishield vaccine siamchhuah chu an titawp tawh tih a sawi.

Developing Countries Vaccine Manufacturers Network (DCVMN) annual meeting neih karlaka chanchinthar lakhawmtute a kawmnaah Poonwalla chuan he thu hi a sawi a ni. Nikum December thlaa vaccine siam chhuah hna an tihtawp hian stock an neih zinga dose maktaduai 100 vel an neih chu a thi (expire) hman tawh tih a sawi bawk.

Poonawalla chuan, "Mipuite hian Covid leh vaccine hi an ning tawh a ni. Hri leng hi an ning tawh a, booster dose la duh pawh an awm loh avangin demand pawh a awm lo a ni," a ti. Amah ngei pawhin Covid chu a ning tawh tih sawiin, "Kan vai hian kan ning tawh a ni," a ti.

Covid hri len chhoh hnuah, SII hian Oxford University nen thawkhdunin kum 2020, April khan Covid vaccine an siam tur thu a puang a, Pune-ah Covishield an siam a ni.

Hri kai thar 2,119 an awm
Union health ministry-in nimina zinga data a tihchhuahah, Ningani khan ram pumah Covid-19 hri kai hmuh chhuah thar mi 2,119 an awm a, hemi hun chhung hian hripui vangin mi 10 an thi.

Ram pumah hri leng hi a ziaawm chho zel a, hri kai mek pawh an tlahniam sawt hle a, mi 25,037 an awm a ni. Hri kai mek hi hri kai hmuhchhuah tawh aṭangin 0.06% ah a tla thla tawh.

Nitina hri kai hmuh chhuah, daily positivity rate chu ram pumah 1.13% niin, weekly positivity rate chu 0.97% a ni tawh bawk.

Ministry-in a tarlan danin, nimin zing thleng khan Covid vaccine dose vaibelchhe 219.50 pek chhuah a ni tawh.