Bilkis Bano case : SC-in petition thehluh ngaihtuah a remti

Supreme Court chuan nimin khan 2002 Bilkis Bano case-a pawngsual rawn leh tualthat case-a thiam loh chantir tawhte ngaihdam leh chhuah an nih chungchanga petition lutte ngaihtuah a remti.

Petition hi National Federation of Indian Women thehluh a ni a, justice Ajay Rastogi leh CT Ravikmar awmna bench chuan a ngaihtuah dawn.

Gujarat sorkar chuan kum 2002-a kum 21 mi, Bilkis Bano pawngsual rawn leh a chhungte mi pasarih thahsak an nih chungchanga thiam loh chantir, mi 11-te chu ngaidamin August 15 khan an tanna, Godhra sub-jail aṭangin a chhuah a ni. Gujarat sorkar thiltih dan hian sawisel a hlawh hle a, Supreme Court-ah pawh petition eng emaw zat a lut tawh bawk. October 18 khan Supreme Court chuan petition lut chungchanga Gujarat sorkar insawifiah tura a tihnaa sorkar chhanna pekah ro relsak an nih dan tam tak tarlang mah se, thil awm dan dik tak, factual statement erawh a tel lo niin a sawi.

Hei vang hian petition thehluttute chu Gujarat sorkar affidavit chungchang an chhanna thehluh hun siamsak lehin, November 29-ah a ngaihtuah dawn a ni.