J&K sorkarin bungalow chhuahsan turin CM hlui Mufti-i a hriattir

Jammu and Kashmir sorkar chuan chief minister hlui, People's Democratic Party (PDP) president Mehbooba Mufti-i chu Gupkar area-ah a official bungalow chu chhuahsan turin a hriattir.

Mehbooba Mufti chuan ni rei vak lo liamtaah khan Estates department aṭangin a chenna, Fair View chhuahsan tura hriattirna hi a dawn thu sawiin, a lo rin lawk tawh a nih avangin mak a tih lem loh thu a sawi. Mahse hriattirna a dawnah, bungalow chu Jammu and Kashmir chief minister awmna tur nia tarlan a ni a, hei erawh chu thu dik lo niin a sawi.

Mufti chuan, "He hmun hi kum 2005, December thla khan chief minister anih hnuah ka pa, Mufti Mohammad Sayeed awmna tura ruahman a ni chauh a ni," a ti. Bungalow hi a chhuahsan dawn chuan awmna tur, ama pualin in a nei lo a, hei vang hian a legal team-te a phut dawn tih a sawi bawk.

State dangah chuan chief minister-te hian an term a zawh hnuin an official residence an chhuahsan a nghal a, mahse J&K-ah chuan dan an siamṭhat avangin CM hluite hi security thil avangin official bungalow-ah hian a awm zui zel phalsak an ni. Mahse he hamṭhatna pekna dan hi central-a BJP sorkarin nikuma Article 370 titawp a, J&K special status pekna a tihbo rual khan a tawp ve nghal a ni.

Mufti chenna, Fairview hi a hma chuan PAPA-II tih niin, mi tangte ngaihsakna hmun tia hriat lar a ni ṭhin. Kum 1989 thleng khan official guest house atan hman a ni, Kum 1990 khan Border Security Force-ten luahin, PAPA-II tiin a building hming hi an vuah BSF-te hian kum 1996 thleng khan he hmun an mi mante thu an zawh leh nghaisakna hmun atan an hmang zui. Mahse kum 1996 khan hetih laia chief secretary, Ashok Jaitley chuan building ah hian insuanlutin, chenna in atan hman zui a ni ta a ni.