India leh Italy ten terrorist beihlet nan inremna 6 siam

India rawn tlawhtu Italy prime minsiter Paolo Gentiloni leh prime minister Narendra Modi te chuan inkawmna hun an nei a, ram pahnih inkara buaina chinfel a nih theih nan hmalakna tur kawng hrang hrang an sawidun a ni.

Thawhṭannia Paolo Gentiloni leh Narendra Modi-a'n inkawmna an neihah hian terrorist beihletna kawnga hma nasa zawka lak dan tur an sawidun a, energy, trade leh railway sector-ah inremna thuthlung paruk an ziak bawk.

He inbiaknaah hian 2012-a Kerala tuipui kama India sangha mantu pahnih thah vanga man Italian marine pahnih chungchang erawh sawi lan a ni lo thung. Modi chuan inkawmna an neih zawha press statement-ah hemi chungchang hi sawi lan a nih loh thu a sawi.

Gentiloni-a'n India a rawn tlawh chhan ber chu tuipuia thilthleng chungchanga inhmuh thiam lohna awm hi chingfel turin a ni a, February 2012 hnu lamah kha thil thleng vang khan ram pahnihte inkarah hian inhmuhthiam lohna a awm phah a ni.

Modi chuan thil hrang hrang an ngaihtuah thu sawiin ter­roeism leh cyber crime beih letna chungchangah ram pahnihte hi an thawhdun tur thu a sawi. Insumdawn tawnna kawngah pawh hma nasa zawka lakna tur kawng tamtak a awm thu a sawi bawk.

Joint statement an chhuahah chuan ram hruaitu pahnihte hian Al-Queda, ISIS leh UN in terrorist-a a puan pawl hrang hrangte beih letna kawnga hma nasa zawka an lak dun tur thu tarlan a ni a, October 7, 2017-a EU Joint Statement on Cooperation in Combating Terrorism, Para 8-a Lashkar-e-Toiba leh Jaish-e-Mohammad chungchang inziahna pawh hma an lak dun tur thu an chhuah a ni.

Inkawmna an neih zawh hnu hian inremna thuthlung paruk - railway, energy leh trade chungchanga thawhdunna ṭha zawk neihna tur an ziak bawk.

India leh Italy inzawmna hi Italy marine pahnih thiltih vangin 2012 hnu lamah hian a chhe hle a, Italian marine pahnih Latorre Massimiliano leh Salvatore Girone chu Kerela tuipui kama India sangha mantu pahnih an thah vangin India sorkar-in a man a ni. Italy chuan heng sangha mantute lawng hian an ramri an pel niin an sawi a, an thubuai hi International Court-ah thlen hial a ni.

Latorre hi kum 2014 khan a hriselna lam ṭhat loh vangin Supreme Court chuan an ramah haw phalna a tichhuak a, Girone pawh hi nikum May thla khan an rama haw a phalsak bawk a ni. Tunah hian Italy-ah awm rih mah se he buaina hi chinfel a la ni lo a, he buaina hian India leh European Union inkar pawh a nghawng hial a ni.

Paolo Gentiloni hi Italy ram hruaitu kum sawm dawn hnu a India rawn tlawh leh hmasa ber a ni.