'Iron Man' of India pianchamah Sorkar hruaitute'n zahna lantir

India deputy prime mi­nister hmasa ver Sardar Vallabhbhai Patel piancham vawi 142-naah Delhi khawpui laili taka a lim an din bulah sorkar laipui hruaitute chuan zahna an lantir. He hunah hian president Ram Nath Kovind, vice president M Venkaiah Naidu, PM Narendra Modi leh home minister Rajnath Singh-te an tel a ni.

Ram Nath Kovind chuan 'Iron Man' of India a nih takzet thu leh ram inpumkhatna thlentu a nih zia twitter-ah a ziak.

Venkaiah Naidu pawhin zahna pangpar a dah bawk a ni.

Narendra Modi pawh­in Sardar Patel pian­cham puala ' Run for Unity' a tlan tur te a vailiam naah thu sawiin Independence hnua ram inpumkhatna thlentu a nih zia a sawi. Modi chuan sorkar hmasa in Sardar Patel-a sulhnu te theihnghilh a nih theih nan hma an la niin a sawi a, ṭhangthar ten an zah thu leh ram inpumkhat nana a hnathawh te an zah thu a sawi bawk.

Modi chuan ram in­pum­khat a ṭul zia sawiin Sardar Patel-a'n lal hrang hrang hnuaia ram awm te India ram siam tura in­pumkhatna a awm theih nana a hmalakna te chu fakin, a thiamna leh a theihna hmangin in­pumkhatna a thlen a ni, a ti.

Kum 1875 October 31-a Nadiad, Gujarat-a khaw te takte a piang, Sardar Patel hi India deputy prime minister hmasa ber a ni a, December 15, 1950 khan a boral a ni. Mi tamtak chuan 'Iron Man' of India tia an hriat Sardar Patel hian India rama civilian chawimawina sang ber Bharat Ratna chu kum 1991 khan ram tana a hnathawh a ṭhat em vangin hlan a lo ni tawh a ni.

Sorkar laipui chuan Sardar Patel piancham October 31 hi "Rashtriya Ekta Diwas" tiin a chhin­chhiah ṭhin.