India Army-in indopui I-naa sipai ruang la dawn

Indian Army hnuaia Garhwal Rifles chuan November thla hian France-ah Indopui I-na hunlaia India sipai nunna chan te ruang la turin team a tir dawn.

French sorkar chuan tunhnai khan sipai ruang pali an hmu chhuak a, heng zinga pahnih hi India sipai ni a hria in India sorkar an rawn hriattir vat a ni. Heng ruang an hmuhna hmun hi Dunkirk aṭanga 70km-a hla, Laventie-ah a ni. Ruang dang pahnih hi chu British leh German sipai ruang a nih thu report chuan a tarlang.

Garhwal Rifles Lt. Colonel Ritesh Roy chuan French sor­kar in ruang an hmuhchhuah zinga pahnihte hian regiment chhinchhiahna '39' an bel avangin Garhwal Rifles mi ngei nia an hriat thu a sawi.

Indopui I-na hunlai hian Garh­wal Rifles regiment hi '39 Garhwal Regiment' tih an ni ṭhin a ni.

Roy chuan sorkar laipui leh India Army thuneitu lu te pawh an hriattir tawh thu leh November thla chhunga heng ruang enfiah tur team an tirh dawn thu a sawi a, Garhwal Rifles ngei an ni tih an finfiah chuan an rawn hawn dawn a ni, a ti.

British sorkar khan 39th Garhwal Rifles-te hi Indopuia an chet ṭhat em avang khan chawimawi nan '39 Royal Garhwal Rifles' tiin a hming a thlak sak a ni. Mahse India-in zalenna a sual chhuah hnu khan a hming pangaiah thlak a ni leh a ni.

Indopui I-na hunalai khan Garhwal regiment 650 chuangin nunna an chan a ni.