Sorkar laipuiin Rajiv Gandhi Foundation licence a tihtawpsak

BJP kaihhruai sorkar laipui chuan Rajiv Gandhi Foundation (RGF) chu dan a bawhchhia nia puhin Foreign Contribution Regulation Act (FCRA) licence a tihtawp sak. Hei bakah hian Sonia Gandhi kaihhruai NGO dang pakhat FCRA licence pek pawh a titawp bawk.

Kum 2020-a union home ministry-in a din, inter-ministerial committee-in RGF hi an chhui chian hnuah license hi tihtawp a ni tih official chuan a sawi.

Congress party president hlui leh Rajiv Gandhi nupui, Sonia Gandhi chu RGF chairperson a ni a, trustees zingah prime minister hlui Manmohan Singh, finance minister hlui P Chidambaram, Congress MP Rahul Gandhi leh Congress general secretary Priyanka Gandhi Vadra-te an tel.

Kum 1991-a din, RGF hian health, science and technology, women and children leh disability chungchangah hma a la a, education sector lamah pawh hna a thawk tel bawk ṭhin.

Union ministry of home affairs (MHA) chuan RGF bakah Sonia Gandhi kaihhruai, Rajiv Gandhi Charitable Trust (RGCT) chu dan bawhchhia nia puhin FCRA licence a tihtawp sak bawk. RGCT-ah hian Rahul Gandhi, Ashok Ganguly, Bansi Mehta leh Deep Joshi-te chu trustees-te an ni. Ram chhunga dinhmun chhe zawk, a bikin thingtlang lama chengte hmasawnna tura ngaihtuahsakna turin kum 2002 khan RGCT hi din a ni. Tunah hian Uttar Pradesh leh Haryana state-ahte Rajiv Gandhi Mahila Vikas Pariyojana (RGMVP) leh Indira Gandhi Eye Hospital and Research Centre (IGEHRC) hmangin hna an thawk mek a ni.

RGF leh RGCT hian New Delhi-a Parliament complex bul, Rajendra Prasad Road-a Jawahar Bhawan-a building pakhatah an awm a ni. Kum 2020, July thla khan BJP sorkar hnuaia MHA chuan Prevention of Money Laundering Act (PMLA), Income Tax Act leh FCRA hnuaiah dan an zawm em tih chhui chiang turin Enforcement Directorate (ED) officer kaihhruai inter-ministerial committee a din a ni. Heng pawl pahnih bakah Indira Gandhi Memorial Trust pawh an chhui chiang bawk a, mahse he trust lakah hi chuan action lak tel a ni lo.