PM Modi-a'n Rozgar Mela a hawng ; Mi 75,000 hnenah appointment letter sem

Sorkar laipui hnuaia department hrang hranga hna ruak hnawh khat a, hna lak runpui siamna tura sorkar ruahmanna, 'Rozgar Mela' chu Inrinni liam ta khan prime minister Narendra Modi chuan a hawng. Hemi ni hian ram chhunga centre 50 aṭangin hna thawk tura lak thar, mi 75,000-te hnenah appointment letter sem a ni.

Employment fair tia sawi bawk, Rozgar Mela hi PM Modi-a'n nakkum kumtawp hmaa thawh tur nuai 10 siam a tumna tihhlawhtlinna tura hmalakna a ni. Official-te chuan central deparmtent hnuaiah hna ruak hi nuai kua chuang a awm niin an sawi a, heng zinga a tam zawk hi kum tam tak chhung hnawhkhat loin an awm tawh a ni.

PM Modi hian Delhi aṭangin video conferencing kaltlangin Rozgar Mela hi a hawng a, centre 50-ah hian union minister-te appointment letter hi an pechhuak a ni. Modi chuan India ram zalenna kum 75-na lawmna pualin, appointment letter 75,000 hi semchhuah a ni, a ti. Thla rei vak lo hnuah hetiang bawk hian tihleh tum a nih thu a sawi nghal bawk.

Hetih lai hian Congress party chuan a ruala appointment letter semchhuah duh vangin sorkar hian candidate-te harsatna leh buaina neih dante ngaihtuah loin, mi tam tak appointment letter hi hun rei tak a hrensak a ni, an ti.