PM Modi-a'n Kargil-a sipaite Diwali hmanpui

Prime minister Narendra Modi chuan nimin khan Kargil-a sipaite Diwali a hmanpui.

Kum 2014-a Prime Minister a nih aṭang khan Modi hian Diwali hi sipaite hmun hrang hrangah a hmanpui ṭhin.

PM chuan sipaite chu a chhungkua te an ni tia sawiin, India ram himna atana pillar pawimawh ber an ni, a ti. Remna leh muanna chu thuneihna tel lo chuan a awm thei lo a ni a ti a, hemi rual hian a kaihhruai sorkar chuan khawvela muanna a awm chu a duh ber a, indona chu a duhthlan hnuhnung ber a ni, a ti.

Firfiaka chetna an beihletna kawnga sipaite huaisenna fakin, " Kargil-ah chuan kan sipaite hian firfiakte an hneh a, kei ngei pawh he thil thleng hretu hi ka ni," tiin PM chuan a sawi. "India ram chu khawvel pawhin a zah tawh. Kan ramrite in venghim a, keini pawhin hmelmate lakah na takin chet kan la bawk. Min rawn cho a nih chuan, kan sipaite chuan hmelmate chu an phu ang chhanna pek dan an hre reng a ni," tiin a sawi.

Ram hruaituten Diwali duhsakna hlan

President Droupadi Murmu, prime minister Narendra Modi leh hruaitu dangte chuan an social media kaltlangin ram mipuite Diwali duhsakna an hlan.

President Murmu chuan a twitter-ah mipuite chu Diwali chibai bukin, midangte tana hlimna thlentu ni turin a chah. Mi tinte hlim taka hun an hmang vek a duhsak thu a sawi bawk.

PM Modi pawhin mipuite chu an chhungte leh ṭhiante nena Diwali hlim taka an hman a beisei thu a sawi. Hruaitu hrang hrangte pawhin festival pualin mipuite duhsakna an hlan bawk a ni.