Armed Force-te ALH an enfiah vek dawn

Indian armed force pathumten advanced light helicopter (ALH) an neihte enfiah vek a ni dawn.

Armed force-te ALH hi a chesual fo a, kar liamta Zirtawpni pawh khan Arunachal Pradesh-a Tuting-ah tlain mi panga an thi a ni. He chetsualna thlen hnu hian thuneitute chuan ALH kawl mekte chu enfiah vek turin an ti ta a ni.

Indian Air Force, Navy leh Army Aviation hian ALH hi 300 vel an nei mek a, Coast Guard-ten tlem an nei ve bawk. Hengte hi force tina helicopter maintenance and repair unit-ten an enfiah ang. Ni hnih chhung velin enfiah hna hi an zawh hman rin a ni.

Army official chuan AP-a helicopter chetsualna a thlen hma khan Air Traffic Control chuan a khawl lam dik lo chungchangah 'Mayday' call a dawn thu a sawi. Chetsualna thlen hun lai hian Tuting boruak hi a ṭha a, pilot pahnihte ALH flying hour pawh hi darkar 600 chuang a ni, a ti.

ALH hi chi li - ALH Mark 1, Mark 2, Mark 3 leh ALH-WSI (weapons systems integrated) an awm. Chi lite hi twin-engine machine vek an ni. Mark 3 leh ALH-WSI version hian engine chak zawk, Shakti an hmang a, hei hi Hindustan Aeronautics Limited (HAL) leh Safran, France-te siam an ni. Arunachal Pradesh-a chesual hi a version thar ber, ALH-WSI a ni a, kum 2015 June thla khan sipaite kutah hlan a ni.