Kerala Governor-in VC 9-te banna thehlut turin a ti

Kerala governor Arif Mohammed Khan chuan Pathianni zan khan state university pakuaa vice-chancellor-te chu bang turin a hrilh a, nimin dar 11:30 khan banna lehkha hi thehlut hman vek turin a ti a ni.

State sorkar chuan VC-te chu an hna chu la chelh zel tura hrilhin, legal leh constitution expert-te ngaihdan te a la dawn a, Governor thupek chhuah chungchang hi court-ah kalpui a tum.

Kar liamta Zirtawpni khan Supreme Court chuan APJ Abdul Kalam Technological University Vice Chancellor ruat dan chu UGC dan a kalh nia sawiin a hnawl a, hemi hnu lawkah Governor hian thupek hi a tichhuak zui ve leh a ni.

VC-te hnena hriattirna a pekah, Governor chuan state university VC atana ruat an nih dan chu ennawn a ngai tih sawiin, heng post-a appointment siam dante hi dan dik taka kalpui a nih theih nan siamṭhat leh a ni dawn a ni, a ti.

Banna thehlut tura hriattirte hi VP Mahadevan Pillai (Kerala University), Sabu Thomas (Mahatma Gandhi University), KN Madhusoodanan (Cochin University of Science and Technology), K Riji John (Kerala Unveristy of Fisheries and Ocean Studies), Gopinath Ravindran (Kannur University), MV Narayana (Sri Sankaracharya University of Sanskirt), MK Jayaraj (Calicut University) leh Anil Kumar (Thunchath Ezhuthachan Malayalam University)-te an ni.

Kerala chief minister Pinarayi Vijayan chuan VC-te chunga Governor thiltih chu sawiselin, RSS ho hmanruaah a ṭang a, a thuneihna dik lo takin a hmangin a ni, a ti. Govenor chu sorkar dodaltu ni loin, ram danpui zahawmna vawngnungtu tur zawk a ni, tiin VC-te laka a chetdan chu a democracy kalphung lo hle niin a sawi.