Diwali tukah khawpui hrang hranga air quality tlahniam

State hrang hrangin Diwali lawmna atana halpuah leh halmawite hal khap mah se, Thawhṭannia Diwali lawmnaah hmun tam takah hal a la ni. Hei vang hian nimin khan India ram khawpui hrang hrangah air quality level a tlahniam hlawm hle.

Delhi sorkarin halpuah leh halmawi a khap chungin, Thawhṭanni zan khan zanlai thlengin hmun tam takah halpuah/halmawi an hal. Nimin zing khan Delhi air quality chu 'very poor' category-ah a awm. Hetichung hian kum hmasa lama Diwali zawh boruak aiin kumin boruak chu tlemin a la ziaawm zawk nia sawi a ni. Nimin zing dar 7 khan Delhi-a air quality index (AGI) chu 326 a ni.

Boruak ṭha, air pollution tlem leh hlauhawm lo, mihring tana ṭha tawka ngaih AQI hi 0-50 niin, 51-100 chu a vantlang 'Moderate' a ni a, mahse asthma leh chuap lama harsatna neite tan chuan thawk lam harsatna thlen thei nia ngaih a ni.

System of Air Quality and Weather Forecasting And Research (SAFAR) chuan nimin zinga Mumbai khawpui boruak chu 'moderate' caterogy niin, AQI hi 74 niin a sawi a, mahse naktuk lamah erawh AQI hi poor caterogy-ah a tlahniam thei dawn niin a sawi bawk.

Haryana leh Punjab-a khawpui ṭhenkhatah pawh air quality hi 'poor' leh 'very poor' ahte a awm. Central Pollution Control Board (CPCB) data-ah a lan danin, nimin zing khan Gugugram, Haryana-a AQI chu 313 niin Ludhiana, Punjab AQI chu 269a ni bawk. Faridabad, Charkhi Dadri, Bhiwani, Ambala, Bahadurgarh, Sonipat, Jind, Yamunanagar, Kurukshetra, leh Panipat-ah pawh air quality hi 311, 301, 291, 241, 279, 214, 296, 211, 276 leh 192 te an ni. Punjab-a Amritsar, Mandi Gobindgarh, Patiala, Jalandhar leh Khanna khawpui boruak pawh 'poor' category-ah awm vekin, AQI hi 249, 208, 225, 260 leh 212-te an ni. Punjab state hian Diwali pualin Thawhṭanni zan dar 8-10 inkar chhung khan halmawi hal a phalsak a, Haryana sorkar hian green cracker chiah hal a phalsak thung.

Khap a ni chungin Delhi leh Maha­rashtra-ah halpuah leh halmawi hal vanga kangmei chhuak report eng emaw zat a awm bawk. Delhi fire department chuan Thawh­ṭanni zan khan kangmei chhuak kaih­hnawih call 200 chuang an dawng a, Maharashtra-ah pawh hmun 11 velah kangmei a chhuak bawk.