India mi 2 rukbo chungchangah India palaiin Kenya President hmu

Kenya rama India mi pahnih rukbo an nih chungchangah, nimin khan Kenya-a Indian high commissioner Namyga Khampa chuan Kenya president William Samoei Ruto a hmu.

Namgya Khampa chuan chin hriat loha awm mek, India mi pahnih, Mohamamd Zaid Sami Kidwai leh Zulfiqar Ahmed Khan-te chungchang chu chhui chiang turin President Ruto hi a ngen tih ministry of external affairs (MEA) chuan a sawi.

Hetih lai hian media report ṭhenkhat chuan India mi pahnihte hi DCI (Directorate of Criminal Investigations) unit in an that niin an tarlang a, mahse Kenya sorkar chuan official-in engmah sawi a la nei lo thung. MEA chuan heng mi pahnihte chungchang ngaihtuahin Kenya sorkar chu an biakpawh reng thu an tarlang bawk.

Mohamamd Zaid Sami Kidwai leh Zulfiqar Ahmed Khan-te hi President Ruto digital campaign team-ah an tel a, July thla khan Mombasa Road-ah an chuanna driver telin chin hriat lohin an bo a ni. An chungchang hi Kenyan police-te Internal Affairs Unit (IAU) in an chhui mek a ni, tiin MEA thupuangtu Arindam Bagchi chuan a sawi.