Ni 196 hnua hri kai hmuh chhuah tlem ber ni thleng

India ramah Covid-19 hri leng a ziaawm chho zel a, Thawhṭanni khan hri kai thar mi 862 hmuh chhuah niin, ni 196 hnua hri kai hmuh chhuah tlem ni ber a ni.

Union health ministry-in data a tihchhuahah, Thawhṭannia hri kai tharte nen Covid-19 hri kai hmuh chhuah tawh hi mi 4,46,44,938 an awm tawh. Hetih lai hian active case pawh a tlahniam zel a, ram pumah hri kai mek hi 23,193 awmin, hri kai tawh aṭangin 0.05% chauh an ni tawh.

Ni khatah hri kai thar, daily positivity rate pawh 1.35% niin, weekly positivity rate chu 1.02% a ni tawh bawk.

Thawhṭanni khan hripui vanga thi mi pathum awm lehin, India ramah Covid-19 hri vanga thi chhinchhiah tawh hi mi 5,28,980 an tling tawh a, hri kai zat aṭangin 1.18% an ni.