Online building approval system hmang dawn

Union Housing and Urban Affairs Minister Hardeep Singh Puri chuan Atal Mission for Urban Rejuvenation (AMRUT) hnuaiah online building approval system hman a ni dawn a, kum khat chhungin he system thar hi khawpui 500-ah hman ṭan tum a ni, a ti.

Online building approval system hi tunah chuan Delhi leh Mumbai-ah chauh hman a ni rih a, he system hmang hian building plan sanction pekchhuah hun hi ni 60 chhungin tihfel hman a ni thei a ni.

Minister chuan online system hi thla reilote hnuah khawpui thlanchhuah hrang hrangah hman theih tuma hma lak a nih tur thu a sawi. In sa turte tan phalna la tura sorkar office hrang hrang tlawh kual a ngai fo a, mahse he system hmang hian awlsam leh rang zawkin sanction an hmu thei tawh dawn a ni, a ti.

Online system hnuaiah hian a diltu chuan form pakhat chauh thehlutin, a dilna chu agency hrang hrang - municipality, water supply agency leh fire department-ahte thawnkual nghal a ni ang a, mimala indawr a ngaih dawn loh avangin phalna hmuh theihna tura thamna inpek ṭhin pawh a reh theih phah dawn nia ngaih a ni.