Covid-19 kai zinga 9,17,568 an dam tawh
India ramah Covid-19 kai pung zel mah se enkawl dam pawh an tam tawh hle a, nimina Ministry of Health and Family Welfare-in report a tihchhuah thlengin enkawl dam mi 9,17,568 an awm tawh a ni.
Ramchhung hmun hrang hrangah hripui kai mi 14,35,453 an awm tawh a, heng zinga 4,85,114 hian an la kai mek a, 32,771 chuan an thihpui tawh bawk. Enkawl dam tawh rate hi 63.92% a ni tawh.India ramah hian nimin sorkar report-ah hri kai hmuh chhuah thar mi 49,931 an awm leh a, hei hi ni khata hri kai hmuh chhuah tam ber ni a ni leh a, sing nga a hnaih hle. Darkar 24 chhungin dama puan mi 31,991 an awm a, thi 708 an awm bawk. Thihpui tawh rate hi 2.28% a ni thung.
Indian Council of Medical Research (ICMR) chuan ram chhung hmun hrang hrang laboratory aṭangin Covid-19 sample dakar 24 chhungin 5,15,472 an test tih tarlangin hei hi ni khatah sample an test tam ber a ni. Hri len ṭan tirh aṭanga nimin thleng khan sample 1,68,06,803 an test tawh. Laboratory pawmpui 1310 nei tawhin sorkar laboratory 906 leh private laboratory 404 a pawmpui tawh a ni.
State/UT zinga recovery rate sang ber Delhi-ah chuan 87.95% lai enkawl dam an ni tawh. Ladakh, Haryana, Telangana leh Assam-te chu enkawl dam rate sanna State/UT niin 74% aiin an recovery rate a sang.
India rama case awm zawng zawng aṭanga 68.83% hi chu Maharashtra, Karnataka, Tamil Nadu, Andhra Pradesh leh Uttar Pradesh aṭangin a ni.