Delhi-ah Odd-Even scheme hmang leh dawn

Delhi khawpui boruak bawlhhlawh chuan zual lam a pan zel a, boruak bawlhhlawh belh zel tur venna kawng khata atan sorkar chua motor number kawpkim leh kawpkim loh inthlanchhawk, Odd-even scheme a hmang leh dawn.

Delhi sorkar hian kumin January leh April thla khan Odd-even scheme hi ni 15 chhung ve ve a lo hmang chhin tawh a, November 13–17 chhungin he scheme hi a hmang leh dawn a ni. He scheme hman chhung hian motor number kawpkim leh kawpkim lote a ni inchhawka tlantir an nih avangin nikhata motor tlanchhuak pawh a chanvein a tlem phah a, hei hian motor khuin boruak a tihbawlhhlawh pawh a tih ziaawm phah a ni. Mahse he scheme hman chhung hian public transport lam a nghawng tel avangin mipuite'n veivahna lamah harsatna an tawh phah a, hei vang hian state sorkar pawhin pollution level chu emergency category-ah darkar 48 chhung a awm hnuah chauh hman a ni ang tiin alo sawi tawh a ni.

Nilaini zan khan Delhi sorkar chuan khawpui chhunga pollution level tihhniam a nih theih dan tur ruahmanna hrang hrangte a puang. Commercial truck-te chu nitin khawsakna atana thil mamawh zual phur an nih loh chuan khawpui chhugah tlanluh khap rih an ni a, insak hna thawktute chu hna chawlhsan rih tura tih niin, mipuiten private motor kengchhuak loa public transport an hman uar zawk theih nan car parking fee pawh a let lia tihpuh a ni bawk.

Delhi High Court chuan khawpui chhung boruak chu mihringte hriselna tana a him tawk tawh lo hle tih sawiin, boruaka khu tam lutuk tihziaawm nan state sorkar hnenah ruah siamchawp, artificial rain surtir dan ngaihtuah turin a ti. Delhi khawpui boruak bawlhlawh hi a chhehvela state, Punjab, Haryana leh Uttar Pradesh-a thlai ro hal khuin a belhchhah bawk a, hei vang hian bench chuan Union Environment Secretary hnenah ni thum chhunga Delhi, Punjab, Haryana leh Uttar Pradesh chief secretary-te chu meeting neihpui a, air pollution tihziaawm dan tur ngaihtuah turin a ti. Delhi Chief Minister Arvind Kejriwal-a chuan khawpui chhung boruak bawlhhlawh zualna chhan pakhat chu an ṭhenawm state-a lo neitute thil hal vang a nih thu a sawi.

World Health Organization kaihhruaina siamah chuan pollution level 50 hnuai lam chu ṭha tawkah ngaih a ni a, level 300 chunglam chu hriselna atana hlauhthawnawmah ngaih a ni. Hetih lai hian Nilaini-a Delhi khawpuia pollution level chu 833 a tling a ni.